कु.निकिता जगतकरच्या कुटुंबियांना सामाजिक न्याय विभागाकडून 4 लाख 12 हजार 500 रुपयांचा धनादेश सुपूर्द ना.धनंजय मुंडें व बाबूराव पोटभरे यांनी न्याय मिळवून देण्याचे दिले होते आश्वासन

परळी (प्रतिनिधी) -: दि.01 : कु निकिता जगतकर आत्महत्या प्रकरणातील आरोपीला अटक करण्यात आल्यानंतर सामाजिक न्याय मंत्री धनंजय मुंडे यांच्या माध्यमातून जगतकर कुटुंबीयांना सामाजिक न्याय विभागाच्या योजनेअंतर्गत 4 लाख 12 हजार 500 रुपये आर्थिक मदत करण्यात आली.
                 या मदतीचा धनादेश जि.प.गटनेते अजय मुंडे व बहुजन विकास मोर्चाचे अध्यक्ष बाबुराव पोटभरे यांच्या हस्ते जगतकर कुटुंबियांना सुपूर्द करण्यात आला यावेळी रा. कॉ.चे शहराध्यक्ष बाजीराव धर्माधिकारी, डॉ. विनोद जगतकर, दत्ता सावंत, अनंत इंगळे, रवी मुळे, नितीन रोडे, केशव गायकवाड, पंचायत समिती सदस्य मुरलीधर साळवे व श्रीहरी मोरे, फुले आंबेडकरी अभ्यासक भगवान साकसमुद्रे,युवा नेते बापू गायकवाड, अमर रोडे, राज जगतकर, किशोर चोपडे, श्यामसुंदर दासूद, सोपान रोडे, स्वप्नील साळवे, राजन वाघमारे, संपादक बालासाहेब जगतकर आदी उपस्थित होते.
ना.मुंडे यांनी क्वारंटाईन असताना या प्रकरणाची दखल घेत जगतकर कुटुंबियांचे फोनवरून सांत्वन करत त्यांना आर्थिक मदत व निकिताला न्याय मिळवून देण्याचे आश्वासन दिले होते.
                   संबंधित प्रकरणी आरोपीला तातडीने अटक करण्याच्या सूचनाही ना.मुंडे यांनी पोलीसांना दिल्या होत्या. त्यानुसार या प्रकरणातील आरोपीस अटक करण्यात आली असून त्याच्यावर ऍट्रोसिटी ऍक्ट व आत्महत्येस प्रवृत्त केल्याचा गुन्हा दाखल करण्यात आला आहे.
सामाजिक न्याय विभागाच्या योजनेनुसार निकिताच्या कुटुंबियांना समाज कल्याण अधिकारी सचिन मडावी यांनी पहिल्या टप्प्यात 4 लाख 12 हजार 500 रुपये आर्थिक मदतीचा धनादेश दिला असून, योजनेनुसार आणखी इतकीच रक्कम या प्रकरणातील दोषारोपपत्र न्यायालयात दाखल झाल्यानंतर देण्यात येणार आहे.